ალკოჰოლის აუტანლობა
დაავადების აღწერა
ალკოჰოლის აუტანლობა იწვევს სწრაფად განვითარებულ უსიამოვნო შეგრძნებებს ალკოჰოლის მიღების შემდეგ. ყველაზე ხშირი სიმპტომები ცხვირის ღრუს დახშობა და კანის წამოწითლებაა. ალკოჰოლის აუტანლობა გენეტიკური მდგომარეობაა. ასეთ პაციენტებში ორგანიზმი ვერ შლის ალკოჰოლს, რაც იწვევს სხვადასხვა სიმპტომს. ალკოჰოლის აუტანლობის მკურნალობა ალკოჰოლისაგან თავის შეკავებაა.
ალკოჰოლის აუტანლობა არ არის ალერგია, თუმცა ზოგჯერ შესაძლოა ალკოჰოლის დანამატებმა (სხვადასხვა ქიმიური მოლეკულები, კონსერვანტები) გამოიწვიონ ალერგიული რეაქცია, რომელიც აუტანლობაში აგვერევა. ალკოჰოლის მიღება სხვადასხვა მედიკამენტებთან ერთად ასევე იწვევს გარკვეულ რეაქციებს.
იშვიათ შემთხვევებში, ალკოჰოლის მიღების დროს განვითარებული რეაქცია მძიმე კლინიკურ პრობლემაზე მიანიშნებს, რომელსაც დიაგნოსტირება და მკურნალობა სჭირდება.
გამომწვევი მიზეზი
ალკოჰოლის აუტანლობის დროს ორგანიზმში არ არის საკმარისი ფერმენტები ალკოჰოლის მოლეკულების დასაშლელად. ეს მდგომარეობა გენეტიკურად მემკვიდრდება და ხშირად გვხვდება აზიელებში.
ალკოჰოლური სასმელის სხვა დანამატებმა შეიძლება გამოიწვიონ აუტანლობის მსგავსი რეაქციები, განსაკუთრებით ლუდსა და ღვინოში. ეს დანამატებია:
- სულფიტები ან სხვა კონსერვანტები
- მარცვლეულობა ან სხვა ქიმიური დანამატები
- ჰისტამინი, ფერმენტაციის ან გამოხდის ნარჩენი პროდუქტი
- ზოგჯერ, რეაქციას იწვევს ალერგია რომელიმე მარცვლეულზე, სიმინდზე, ხორბალზე ან სხვა დანამატზე.
- იშვიათ შემთხვევებში, ალკოჰოლის მიღების დროს განვითარებული რეაქცია მძიმე კლინიკურ პრობლემაზე მიანიშნებს, როგორიცაა ჰოჯკინის ლიმფომა.
სიმპტომები
ალკოჰოლის აუტანლობის (ან სასმელის დანამატების მიმართ რეაქციის განვითარების) ნიშნები და სიმპტომებია:
- სახის წამოწითლება
- თბილი, წითელი ამობურცულობა კანზე, ახლავს ქავილი
- არსებული ასთმური მდგომარეობის გაუარესება
- ცხვირის ღრუს დახშობა ან გამონადენი ცხვირიდან
- დაბალი არტერიული წნევა
- გულისრევა და ღებინება
- ფაღარათი
როდის მივმართოთ ექიმს
- შეიძლება არ დაგჭირდეთ კონსულტაცია ექიმთან, თუ გაქვთ მსუბუქი აუტანლობა ან რეაქცია სასმელის დანამატებზე. რეკომენდირებულია ალკოჰოლისაგან თავის შეკავება, რაოდენობის შემცირება ან გარკვეული ტიპის სასმელის ნაკლები მიღება. თუ გაქვთ მძიმე სიმპტომები და ტკივილი, აუცილებლად მიმართეთ ექიმს. ასევე, თუ თქვენი სიმპტომები უკავშირდება ალერგიას ან რაიმე მედიკამენტს, დაუკავშირდით ექიმს.
